سروودی گۆڕان
شەوبوو ئەوسا
جەنگەڵ تاریک،
زریان چاوی هەڵدەکۆڵی،
ئێمە گەش بووین
ئێمە دڵمان چراخان بوو
لەلابەلای شەوەزەنگدا،
پەلکەزێڕینەی هیوامان بەدی دەکرد
باخچەی دڵمان هەمیشە سەوز،
گوڵباران بوو
خەزان وەرزی پێشینیان،
ژاکان داستانی پیران بوو
بێزاری بێز، گریان شەرم،
کەنەفتی ئابڕووتکان بوو
بەرچاومان ڕوون، رێگەمان تەخت،
ئایندەمان وەرزی دروێنەی زەحمەتی ئەمڕۆمان بوو
ئێمە ئەوسا یەک پوورەهەنگ،
یەک پۆلە سوێسک، نەوای دڵچەسپی یەک ئاهەنگ،
ئاسمانی شینی ساماڵ بووین
یەک بازووی پڕ،
یەک شاباڵ بووین
راستی ئێمە چی بووین ئەوسا!
یا مناڵ بووین، یا خەیاڵ بووین
بەڵام ئەفسووس!
وەک پۆلەسوێسکی سەرکانی
دوای شریخەی راوچیی کەمین،
بنچک بنچک،
بن بەرد بن بەرد،
پەرشیان کردین،
ئەژنۆی ترس و دەستی قەدەر
خولیای ئاوات و سەودای سەر
ئێستاش جارجار لەدوورەوە،
یا لەبرسا
یا لەترسا
یا لە بێزاریی تەریک بوون،
یان بەیادی رەوتی سەر سەوزەگیای ئەوسا
جارجار بۆ یەکتر ئەخوێنین
بەڵام قاسپەی ساردو بێ گیان
تەزوو ناهێنێ بە لەشدا وەکوو جاران
ئێمە ئێستاکە گۆڕاوین
کوانووی ساردی دامرکاوین
ئێمە ئێستاکە خۆمانین،
یەکتری نین
ئێستاکە من
نەئەو دڵەم
کە بەخەیاڵ دڵی خۆش کا،
نەئەو چاوەم
کە چاو ببڕێتە هەزاس سآڵ دوای کوێربوونی،
نەئەو دەستەم کە مشت بکا بەرەو ئاسمان!
من ئێستاکە تەنیا خۆمم
ئەم و ئەو نیم
منی ئەمڕۆم
هی دوێنێ نیم
چاک ئەزانم دوێنێ چی بووم ئەمڕۆ چی هەم
بەڵام سبەی؟
نازانم چیم!
14/12/1993
بۆهاورێی خۆشەویستم کاکە شێرکۆ: بەناوی هەموو ئەو برادەرانەوە کەجاران وەک یەک پۆلە سوێسک بەناو چیمەنی باخی گشتی و مامەیارەو سەرچناردا، قۆڵ لەناو قۆڵ و دڵ لەپاڵ دڵ رۆژگاری درێژمان کورت دەکردەوە، ئەم سروودە دەخوێنم کە هیوادارم کەمێک لە مەشاعیری ئێوەشی دەربڕیبێ. دڵسۆزت ناصح 14/12/1993
Nasih Othman ------- د. ناصح قهرهداغى 