نەفرین
بۆ ئەبوبەکر قەرەداغی
دەستی نازە یا قامچیی رق
خەزان لاسکی وشک هەڵاتووی
گوڵانی تا دوێنی ڕەنگین،
ئەمرۆ بێتین،
ئەلاوێنێ!
گوڵێکی وشک
تۆوی لەسەر باڵی خەزان
کەوتە ئاسمان.
دەشتاو دەشت و چیا چیا
سوورایەوە
تا چاوی نێشت.
کاتێ تینی خۆری بەهار،
خوینی جمان
پێڵووی لاوازی هەڵهێنا
دی چواردەوری بەردەلانە
ژێری تاوێر
هەرچەند زەمین دەداتە بەر
تاسەی ڕەگی پاراو نابێ،
هەرچەند باڵای دەباتە سەر
هەتاو تێر تێر
پرچی گەلای شانە ناکا.
ئەی گولەکەی لەخەزان زاو
چارەنووسە یا نەفرینی خودایانە
وا شەوی تۆ تاریکترە؟
زەمینت رەق
زریانت سەخت،
مارو موری دەوروبەرت برسیترە؟
تۆ یەک گئڵ نیت،
تۆ یەک درەختی ئارەزووی
ناو گیاکەڵەی چارەنووسی
ریشەت لەناو دڵی بەردا داکوتاوە
زریان چۆکت پێ دانادا
بەفر پەنجەت ناتەزێنێ.
کام داربەڕوو
تینی رەگی لە رەگی تۆ بەهێزترە؟
کام سپیدار
باڵای لە باڵای ئارەزووی تۆ هەڵئەسوێ؟
کام گوڵاڵە وەک تۆ عاشق؟
کام نێرگسە وەک تۆ بۆنخۆش؟
کام وەنەوشە وەک تۆ پاک و بێ ئازارە؟
تۆ یەک درەختی ئارەزووی
ناو گیاکەڵەی چارەنووسی
دەمێ برسی
دەمێ تینووی
لق و پۆپت دادەپاچن
ئاگر لەباڵات بەر دەدەن
هەناوت رەش دادەگەڕێ
لەناو زاخاوی بریندا گینگڵ دەدەی
بەڵام هەرگیز چۆک دانادەی،
قەت ناکەوی
قەت نانەوی!
***
هاوینی 1994
Nasih Othman ------- د. ناصح قهرهداغى 