تەلیسم بۆ د. مارف عومەر گوڵ
چی گەواڵەی ئاسمان هەیە
هەرچی “هەوری نەبان”1 هەیە
کۆبنەوە و هەموو بەسەر خاکا داکەن
قاسپەی شیعرت دڵی دامێن بێنێتە جۆش
گوێی شاخ کەڕ کا
فرمێسکی خەم کوێرەکانی بتەقێنێ
ئاهی ساردت وەکوو گەڵا بۆ روومەتی خاک سێبەر کا
زەحمەتە دی
جارێکی تر نێرگسەجاڕ مژدەی بەهار بە خاک بدا
گوڵاڵەی سوور هەواری عەشق بخەمڵێنێ
دەستی شنە گوڵە گەنم بلاوێنێ
پیرە بەڕوو بژێتەوە و گەڵا دەرکا
جادوویەکە لە خۆمان کرد
خۆمان دایە دەستی زریان
خاکمان تۆران
عەشقی رەنجبەرمان سەربڕی
ئاومان خنکان
!چیمان نەکرد
!پاکیمان کوشت، ناپاکیمان ناونا ویژدان
!ئەم تەلیسمی زوڵمە سا کەی بکرێتەوە
!ئەم “گریانی خوێنە “2 سا کەی ببڕێتەوە
داستانێکە سەرگەردانی ڕشتەیەتی
!جادووگەر ئامان، هیممەتێ
١١/٧/٢٠٢٠
1،2: هەوێنی ئەم ڕامانە شیعرییە هۆنراوەی (هەوری نەبان) ی د. مارف عومەر گوڵە کە ساڵی ٢٠٢٠ بۆی ناردم و ئەو دوو چەمکەش لە هۆنراوەکەی ئەو وەرگیراون. یادی بەخێر. ***
Nasih Othman ------- د. ناصح قهرهداغى 